திருச்சி, ஏப். 15: திருச்சியில் அ.தி.மு.க. தேர்தல் பிரசாரத்தின் போது, கூட்டுறவு சங்க தலைவரை கடப்பாரையால் ஒரு கும்பல் தாக்கியது. இதுதொடர்பாக அ.ம.மு.க.வை சேர்ந்த 3 பேரை போலீசார் கைது செய்தனர்.

திருச்சி நாடாளுமன்ற தொகுதியில் அ.தி.மு.க. கூட்டணி சார்பில் தே.மு.தி.க. வேட்பாளர் டாக்டர் இளங்கோவன் போட்டியிடுகிறார். அவரை ஆதரித்து திருச்சி 38-வது வார்டு அதிமுக வட்ட செயலாளரும், தென்றல் நகர் கூட்டுறவு சங்க தலைவருமான கந்தசாமி மகளிர் அணி நிர்வாகிகளுடன் சாத்தனூர் பகுதியில் வீதி, வீதியாக சென்று வாக்கு சேகரித்துக் கொண்டு இருந்தார்.

அப்போது அங்கு 8 பேர் கொண்ட ஒரு கும்பல் திடீரென கடப்பாரைகளுடன் வந்தது. அந்த கும்பலை சேர்ந்தவர்கள் கந்தசாமியை கடப்பாரைகளால் சரமாரியாக தாக்கினார்கள். இதை பார்த்து அதிர்ச்சி அடைந்த அதிமுக மகளிர் அணியினர் அங்கிருந்து அலறி அடித்து ஓடினார்கள். இந்த தாக்குதலில் கந்தசாமிக்கு தலையில் பலத்த காயம் ஏற்பட்டதுடன், அவருடைய கால்களில் எலும்பு முறிவு ஏற்பட்டது.

இதைதொடர்ந்து படுகாயத்துடன் கிடந்த கந்தசாமியை அங்கிருந்த வர்கள் மீட்டு தனியார் மருத்துவ மனைக்கு சிகிச்சைக்காக அனுப்பி வைத்தனர். இதுகுறித்து தகவல் அறிந்த கே.கே.நகர் போலீசார் சம்பவ இடத்துக்கு விரைந்து சென்று விசாரணை நடத்தி தென்றல்நகர் கூட்டுறவு சங்க தேர்தலின் போது, அ.தி.மு.க.- அ.ம.மு.க. கட்சியினரிடையே மோதல் ஏற்பட்டது. அதனால் ஏற்பட்ட முன்விரோதம் காரணமாக கூட்டுறவு சங்க தலைவர் கந்தசாமி மீது அ.ம.மு.க.வினர் தாக்குதல் நடத்தியது தெரியவந்தது.

இதுகுறித்து தகவல் அறிந்த வெல்லமண்டி நடராஜன் தனியார் மருத்துவமனைக்கு சென்று, அங்கு சிகிச்சை பெற்று வரும் கந்தசாமியை நேரில் சந்தித்து ஆறுதல் கூறினார். இந்தநிலையில் கூட்டுறவு சங்க தலைவரை தாக்கியது தொடர்பாக சாத்தனூர் பகுதியை சேர்ந்த அ.ம.மு.க. வட்ட செயலாளர் மதியழகன் மற்றும் பழனியாண்டி, எல்.ஐ.சி.காலனியை சேர்ந்த வெள்ளதுரை ஆகிய 3 பேரை போலீசார் கைது செய்தனர். மேலும் 5 பேரை போலீசார் தேடி வருகிறார்கள்.