6 பாடத்திட்டம் தொடர்ந்து நீடிக்கும்

சென்னை

சென்னை, மே 11:  பிளஸ் 1, பிளஸ் 2 வகுப்புகளில் 6 பாடங்கள் இருப்பதை 5-ஆக குறைக்க இருப்பதாக வெளியான செய்திக்கு பள்ளி கல்வித்துறை அமைச்சர் செங்கோட்டையன் மறுப்பு தெரிவித்துள்ளார். 6 பாடத்திட்டம் தொடர்ந்து நீடிக்கும் என அவர் கூறியுள்ளார்.

இது குறித்து அமைச்சர் செங்கோட்டையன் அளித்த பேட்டியில் கூறியிருப்பதாவது:- வரும் கல்வியாண்டில் பிளஸ் 1, பிளஸ் 2 வகுப்புகளுக்கு வழக்கம்போல் ஆறு பாடங்கள் இருக்கும். பாடங்களைக் குறைப்பது குறித்து எந்த விதமான ஆலோசனைக் கூட்டங்களும் நடத்தப்படவில்லை, இது தொடர்பாக முடிவுகளும் எடுக்கப்படவில்லை.

தேர்தல் நேரம் என்பதால் இதுபோன்ற தவறான தகவல் பரப்பப்பட்டிருக்கலாம். தமிழகத்தில் இருமொழிக்கொள்கை தொடர்ந்து நடைமுறையில் இருக்கும். எனவே மாணவர்கள் இது குறித்து அச்சப்படத் தேவையில்லை. அதேபோன்று பத்தாம் வகுப்பில் மொழிப் பாடங்களுக்கு இரண்டு தாள்கள் என தற்போதுள்ள நிலையே தொடரும் என்றார்.

முன்னதாக தமிழகத்தில் வரும் கல்வியாண்டு முதல் பிளஸ் 1, பிளஸ் 2 வகுப்புகளில் ஏதாவது ஒரு மொழிப்பாடத்தை தேர்வு செய்து படிக்கும் முறை அமலாகும் என செய்திகள் வெளியாகி இருந்தன.  பத்தாம் வகுப்பு, பிளஸ் 1, பிளஸ் 2 தேர்வு முறைகளில் பல்வேறு மாற்றங்களை செய்வதற்கான திட்டத்தை பள்ளிக் கல்வித்துறை அரசின் ஒப்புதலுக்காக அனுப்பியதாக வெள்ளிக்கிழமை தகவல் பரவியது.

அதன்படி பிளஸ் 1, பிளஸ் 2 பயிலும் மாணவர்கள் மொழிப் பாடத்தில் தமிழ் அல்லது ஆங்கிலம் ஆகிய பாடங்களில் ஏதாவது ஒன்றை விருப்பப் பாடமாக தேர்வு செய்தால் போதும் என குறிப்பிடப்பட்டு இருந்ததாகவும், மேலும் மேல்நிலை வகுப்புகளில் வகுப்பில் 600 மதிப்பெண்களுக்கு பதிலாக இனி 500 மதிப்பெண்களுக்கு மட்டுமே தேர்வு நடத்தப்படும் என கூறப்பட்டு இருந்ததாகவும் தெரிவிக்கப்பட்டன. இவற்றை அமைச்சர் மறுத்துள்ளார்.