மும்பை, மே 16: நடிகர் சஞ்சய் தத் விடுதலை போன்று, பேரறிவாளனுக்கு ஏன் வாய்ப்பு அளிக்கப்படவில்லை என்று ஆர்.டி.ஐ வெளிப்படுத்தும் தகவல் மூலம் கேள்வி எழுந்துள்ளது.

கடந்த 1993-ம் ஆண்டு நடந்த மும்பை தொடர் குண்டுவெடிப்பு சம்பவத்தில் 257 பேர் பலியாகினர். 2000க்கும் மேற்பட்டோர் படுகாயமடைந்தனர். இந்த வழக்கில் நடிகர் சஞ்சய் தத் கைது செய்யப்பட்டார். அவரது வீட்டில் இருந்து ஏராளமான ஆயுதங்கள் கைப்பற்றப்பட்டன.

அவருக்கு தடா சிறப்பு நீதிமன்றத்தில் ஆயுத தடை சட்டத்தின் படி, 6 ஆண்டுகள் சிறை தண்டனை விதிக்கப்பட்டது.  இதையடுத்து உச்சநீதிமன்றத்தில் மேல்முறையீடு செய்து, 5 ஆண்டுகளாக தண்டனை குறைக்கப்பட்டது.

பின்னர் நன்னடத்தை அடிப்படையில், 2016-ம் ஆண்டு பிப்ரவரி 25-ம் தேதி, மும்பை ஏரவாடா சிறையில் இருந்து சஞ்சய் தத் முன்கூட்டியே விடுவிக்கப்பட்டார். இது பெரும் சர்ச்சையை ஏற்படுத்தியது.

இந்நிலையில் சஞ்சய் தத் விடுதலை குறித்து, மும்பை எரவாடா சிறை நிர்வாகத்திடம் ஆர்டிஐ மூலம் பேரறிவாளன் தரப்பு பெற்றுள்ளது. அதில், நடிகர் சஞ்சய் தத்தை முன்கூட்டியே விடுதலை செய்ய மகாராஷ்டிர அரசு, மத்திய அரசிடம் அனுமதி பெறவில்லை என்று தெரியவந்துள்ளது.

ஆனால் ராஜீவ் காந்தி கொலை வழக்கில் சிறையில் இருந்து பேரறிவாளன் உள்ளிட்ட 7 பேரை விடுவிக்க, அரசியல் சாசன சட்டப்பிரிவு 161-ன்படி தமிழக அரசின் அமைச்சரவை தீர்மானத்தின் மீது முடிவெடுக்கவில்லை.

அதற்குப் பதிலாக கவர்னர் பன்வாரிலால் புரோஹித் முடிவிற்காக காத்திருக்கும் சூழல் ஏற்பட்டுள்ளது. ஆனால் இந்த விவகாரத்தில் விரைந்து முடிவெடுக்காமல், கவர்னர் காலம் தாழ்த்தி வருகிறார்.
இதன்மூலம் சஞ்சய் தத்திற்கு ஒரு நீதி, ராஜீவ் கொலை குற்றவாளிகளுக்கு ஒரு நீதியா என்று கேள்வி எழுந்துள்ளது.