கொல்கத்தா, செப்.18: கொல்கத்தாவில் உள்ள நேதாஜி சுபாஷ் சந்திர போஸ் விமான நிலையத்தில் மேற்குவங்க முதல்வர் மம்தா பானர்ஜியும், பிரதமர் மோடியின் மனைவி யசோதா பென்னும் சந்தித்து பரஸ்பரம் நலம் விசாரித்தனர்.

டெல்லி செல்வதற்காக விமான நிலையம் வந்த மம்தாவும், மோடியின் மனைவியும் ஒருவரை ஒருவர் சந்தித்துக் கொண்டது அரசியல் வட்டாரத்தில் ஆச்சரியத்தை ஏற்படுத்தியுள்ளது.

பிரதமர் மோடிக்கு நேற்று பிறந்த நாள். நாடே அவரது பிறந்த நாளைக் கொண்டாடி வந்தது. இந்த தருணத்தில் ஜார்கண்ட்டில் இருக்கும் தன்பாத் என்ற இடத்துக்கு வந்துவிட்டு, குஜராத் திரும்பிச் செல்ல யசோதா பென் கொல்கத்தாவில் இருக்கும் நேதாஜி சுபாஷ் சந்திர போஸ் விமான நிலையத்திற்கு வந்தார்.

அப்போது டெல்லி செல்வதற்காக விமான நிலையத்திற்கு வந்த மம்தாவும், யசோதாவும் சந்தித்துக் கொண்டனர். இருவரும் நலன் விசாரித்துக் கொண்டனர். அப்போது மேற்கு வங்கத்தில் நெசவு செய்யப்பட்ட சேலை ஒன்றை யசோதாவுக்கு மம்தா பரிசளித்தார்.

ஜார்கண்டில் இருக்கும் தன்பாத்தில் இருந்து 68 கி. மீட்டர் தொலைவில் இருக்கும் அசன்சோல் (மேற்குவங்கம்) என்ற இடத்தில் கல்யானேஸ்வரி கோயில் உள்ளது. இங்கு கடந்த திங்கள் கிழமை யசோதா சிறப்பு பூஜை செய்தார்.

டெல்லியில் இன்று மாலை பிரதமர் மோடியை மம்தா சந்திக்கிறார். அப்போது, மாநில மற்றும் மத்திய அரசுகளின் உறவுகள் மற்றும் மாநிலத்துக்கு தேவையான நிதி குறித்து விவாதிக்கிறார். மேலும், மேற்குவங்க மாநிலத்தை பாங்ளா என்று மாறுவது குறித்தும் மம்தா விவாதிப்பார் என்று தெரிய வந்துள்ளது.