சென்னை, மார்ச் 21: மதுரவாயலில் இயற்கை உபாதை கழிப்பதற்காக வெளியில் வந்த 10 வயது சிறுமியை மொட்டை மாடிக்கு அழைத்து சென்று பாலியல் வன்கொடுமை செய்து 3வது மாடியிலிருந்து தூக்கிவீசி கொலை செய்த பக்கத்துவீட்டுக்காரனை போலீசார் கைது செய்தனர்,

சென்னை மதுரவாயல் எம்எம்டிஏ காலனி 9-வது தெருவை சேர்ந்தவர் சீனிவாசன். இவரது 10 வயது மகள் அந்தப் பகுதியில் உள்ள தனியார் பள்ளியில் 5-ம் வகுப்பு படித்து வந்துள்ளார். நேற்று நள்ளிரவில் இயற்கை உபாதையை கழிக்க கழிவறை செல்வதற்காக வீட்டிலிருந்து அந்த சிறுமி வெளியே வந்துள்ளார்.

நீண்ட நேரமாகியும் திரும்பி வராததால் சந்தேகமடைந்த பெற்றோர் வெளியே வந்து தேடியுள்ளனர். ஆனால், எங்கு தேடியும் சிறுமி கிடைக்காததால், உடனடியாக காவல் கட்டுப்பாட்டு அறைக்கு தகவல் தெரிவித்துள்ளனர். இது குறித்து தகவல் கிடைக்கப்பெற்றதும், மதுரவாயல் போலீசார் சம்பவ இடத்திற்கு விரைந்து சிறுமியை தேடியுள்ளனர்.

அப்போது, வீட்டின் பின்புறம் படுகாயங்களுடன் சிறுமி உயிருக்கு போராடியவாறு மயங்கி கிடந்துள்ளதாக கூறப்படுகிறது. உடனடியாக சிறுமியை மீட்ட போலீசார், அருகில் உள்ள தனியார் மருத்துவமனைக்கு கொண்டு சென்று சிகிச்சைக்காக சேர்த்தனர்.

ஆனால் சிகிச்சை பலனின்றி அதிகாலை 2.30 மணியளவில் சிறுமி உயிரிழந்துள்ளார். இதனையடுத்து, சிறுமியின் சடலத்தை கீழ்ப்பாக்கம் அரசு மருத்துவமனைக்கு பிரேத பரிசோதனைக்காக மதுரவாயல் போலீசார் அனுப்பிவைத்து இந்த சம்பவம் குறித்து தீவிர விசாரணை மேற்கொண்டனர்.

சிறுமியின் பக்கத்துவீட்டில் வசித்துவரும் சென்ட்ரிங் தொழில் செய்யும் சுரேஷ் (வயது 29) தான் இந்த கொடூர செயலை செய்தது போலீஸ் விசாரணையில் தெரியவந்தது.

இதனையடுத்து, சுரேஷை கைது செய்து போலீசார் நடத்திய விசாரணையில், நள்ளிரவில் கழிப்பறைக்கு சென்ற சிறுமியை நோட்டமிட்டு வலுக்கட்டாயமாக தூக்கி சென்று பாலியல் பலாத்காரம் செய்ய முயன்றதாகவும், அப்போது சிறுமி அலறியதால் அவரை தாக்கி 3-வது மாடியிலிருந்து தூக்கி வீசி கொலை செய்ததாகவும் விசாரணையில் தெரியவந்துள்ளது.

நிருபயா பாலியல் குற்றவாளிகளை தூக்கிலிட்ட அதேநாளிலேயே மதுரவாயலில் சிறுமிக்கு நடந்த பாலியல் கொடூர சம்பவம் அப்பகுதியில் பெரும் அதிர்ச்சியை ஏற்படுத்தியுள்ளது.